Dette er den søraustlege delen av Lifjell. Turen til Jøronnatten og Røksbufjellet er for dei som likar fysiske utfordringar og vakker, vill og storslått natur. Høge nutar, praktfull utsikt, fine fiske- og badevatn og ville gjel med fossar og stup møter deg på turen. Jøronnatten (1 276 moh) er ein av dei høgaste toppane på Lifjell med flott rundskue. Berre Røysdalsnuten og Troganatten er høgare. Jøronnatten er eit felles grensepunkt mellom kommunane Notodden, Midt-Telemark og Seljord. Høgdeforskjellen er om lag 750 m frå parkering Røytejuv inst i Limarka opp til Jøronnatten.
Røksbufjellet byr på mange fine naturopplevingar og er verd ein avstikker på umerka stiar/beitetråkk av sau. På tilbaketuren går den merka stien forbi eit stort fjellvatn med godt fiske; Holmen. Her ligg hytta til Bø Fiskelag. Valjuvet er ein trong og brattlendt liten «Vestlandsdal» med elvebrus frå Gjufsåa og bekken som stupar ut frå Kloppesteintjønn. Du går tett inn på ein flott foss øverst i dalen. I dalen er det godt beite for sau.
- Segna om jutulane Jøron og Øystein i Hellerdalen: Les meir….
Vegen fram til parkeringsplassen
Du finn parkeringsplassen ved Røytejuvstølen 11 km frå Bø sentrum (rundkøyring). Følg først riksveg 36 mot Seljord 0,4 km frå Bø sentrum og ta av mot Oterholt ved bensinstasjonen Cirkel K. På Oterholt, etter 2,8 km, svingar du halvt til høgre opp mot Li (Liheia). Etter 5,4 km frå Bø sentrum og opp alle bakkane i Liheia tar du rett fram ved skiltet til Innleggen (ikkje til venstre). Følg bomvegen innover «Limarka» og opp alle bakkane til parkeringsplassen under Røytejuvstølen.
Kart
- Dei merka turstiane finn du på trykt Turkart Bø, 2011.
- Ta med deg alle turstiene til Bø Turlag og Gvarv Turlag ut på mobilen Les meir….
- Klikk på dei to kartbildene under…
Kartplakaten som står på informasjonstavler på parkeringsplassane kan du sjå her. Den viser den søraustre delen av Lifjell.
Du kan navigere rundt i webkartet (zoom og pan) i alle turområda til Bø Turlag og Gvarv Turlag. Klikk på kartobjekta og sjå på informasjon om natur og friluftsliv i tekst, bilde og video.
Søk på eit turmål, for eksempel Jøronnatten.
Alle foto: Arne W Hjeltnes.
