Gygrestolen har til alle tider vore eit kjent landemerke for folk i Bø. Gygrestolen, med ura og dei to kjempeblokkene, er ikkje berre ein heilt spesiell og særeigen fjellformasjon skapt av siste istid, men det knyter seg også segner til stolen og ura.
Turen opp til Gygrestolen er stort sett ein lang oppoverbakke. Ein går først i tett skog, seinare på svaberg og oppe på platået er det open furuskog. På grunn av stor trafikk er delar av stien sterkt slitt med mykje stein og røtter. I vått eller kaldt vêr (is) er dette utfordrende, særleg for dei yngste. Når vi kjem fram til Svarttjørn, har vi lagt bak oss dei lengste motbakkane. På nordvestsida av tjørna er det ein underleg hole i to etasjar. Oppe på platået kan vi anbefale ein kort avstikkar til Venetjønn, som på fine sommerdagar kan friste med eit bad.
Turen går vidare i småkupert terreng fram til Gygrestolen. Det er flott utsikt mot dei to store steinblokkene (stolen), ura under og eit vakkert kultur- og naturlandskap. Tilbaketuren går du mot aust gjennom gamal naturskog. Frå Maurknatten får vi ein flott utsikt mot den store, grove ura under stolen. Klikk på bildet til høgre for å sjå på plakaten som står på parkeringsplassen.
God badeplass til Eikjabygda Vel ved Uvdalstjønna. Vi ønskjer ikkje at den vesle badeplassen blir bruka som teltplass.
Vegen fram til parkeringsplassen
Avstanden fra Bø sentrum til parkering nær Uvdalstjønna er ca 8 km. Følg først riksveg 359 mot Lunde frå Bø sentrum (rundkøyring). Etter ca 4 km tar du til høgre mot Tveiten ved Tjønnås. Lenger framme må du ikkje ta av til høgre på Dagstjønnvegen, men køyr rett fram i krysset. Ved parkeringsplassen finn du informasjonstavle og blåmerka sti opp til Gygrestolen. Her er det to parkeringsplassar med renovasjon og sanitæranlegg. Det er parkeringsavgift (Vipps).
Kart
- Dei merka turstiane finn du på trykt Turkart Bø, 2011.
- Ta med deg alle turstiene til Bø Turlag og Gvarv Turlag ut på mobilen Les meir….
- Klikk på dei to kartbildene under…
Informasjonstavler på parkeringsplassane viser kart på plakatar i A3-format. Kartplakaten kan du sjå her.
Du kan navigere rundt i webkartet (zoom og pan) i alle turområda til Bø Turlag og Gvarv Turlag. Klikk på kartobjekta og sjå på informasjon om natur og friluftsliv i tekst, bilde og video.
Søk på eit turmål, for eksempel Gygrestolen.
Foto: Arne W Hjeltnes
