Dette er den søraustre delen av Lifjell. Lifjell har eit variert og mangfaldig landskap med høge nutar, djupe dalar med vatn og ville elvegjel. Fjelltoppane har oftast ein avrunda form, men kan og vere tindeforma med bratte stup. Mellom toppane finn vi eit rolegare landskap.
Øysteinnatten (1174 moh) er eit kjent landemerke og turmål. Her oppe er det eit flott rundskue over Lifjell mot Gaustadtoppen, Blefjell og sørover mot Vestfold og Grenland. Frå parkeringa på Jønnbu og heile vegen opp til toppen er det storslagen utsikt. Etter dei lange bakkane opp Krinto og Glekse ser du Skåråfjellholmen. Her kan du fiske og bade i godt vêr. Vidare får du eit langt stykke med rolegare terreng før siste oppstigning til sjølve Øysteinnatten. Høgdeforskjellen er omlag 400 m, og avstanden frå parkeringsplassen er 4,7 km.
Du kan velje mellom to rundturar tilbake til Jønnbu. Den same vegen tilbake frå Øysteinnatten er kortast. Vel heller ein litt tyngre tur langs ryggen vestover frå Øysteinnatten. Den er luftig, men trygg. Du går så ned forbi Storsteintjønn og opp over Gleksefjell. Ein liten avstikkar til Skrubbelinuten er fristande. Det er flott utsikt mot Bø og heile Midt-Telemark.
Du kan og køyre inn Årmotdalen til Grønbygil og gå opp Økterngvølven til Økteren (450 høgdemeter) og vidare opp til Øysteinnatten; 200 nye høgdemeter. På Øktern er det flott utsikt innover Lifjell mot Gaustadtoppen og Blefjell.
Bø Fiskelag har kultivert fleire av vatna i området.
Om vinteren fører preparerte skiløyper til Lifjell løypelag deg opp i fjellet. Det siste stykket frå Snotjønnhovet og fram til toppen følgjer du kvista skiløype.
- Ei brosjyre informerer om turen: Les meir …
- Informasjonsplakat til høgre står på parkeringsplassen. (Klikk på bildet.)
- Segna om jutulane Jøron og Øystein i Hellerdalen: Les meir….
- Fleire namn på fjellet: Les meir …
Vegen fram til parkeringsplassen
Ta først nordover frå Bø sentrum (rundkøyring) mot Notodden på Folkestadvegen. Etter 4,0 km, like etter avkøyringa til Sommerland, svingar du til venstre inn på Lifjellvegen. Følg vegen rett fram i alle kryss til parkering på Jønnbu (mot avgift) etter 13,2 km frå Bø sentrum.
Kart
- Dei merka turstiane finn du på trykt Turkart Bø, 2011.
- Ta med deg alle turstiene til Bø Turlag og Gvarv Turlag ut på mobilen Les meir…..
- Klikk på dei to kartbilda under…
Kartplakaten som står på informasjonstavler på parkeringsplassane kan du sjå her. Den viser den søraustre delen av Lifjell.
Du kan navigere rundt i webkartet (zoom og pan) i alle turområda til Bø Turlag og Gvarv Turlag. Klikk på kartobjekta og sjå på informasjon om natur og friluftsliv i tekst, bilde og video.
Søk på eit turmål, for eksempel Øysteinnatten.
Foto: Arne W Hjeltnes.
